Zer da Elegose irakurle taldea?
- Fedibertsoan elkartzen den irakurketa talde irekia.
- Hilero euskarazko liburu bat hautatu, irakurri eta komentatzen dugu.
#Maiatzeko liburua: Bizitzea ez al da oso arriskutsua?
Goazen ba Elegoserentzat egiten dudan laugarren “kritika” literarioarekin! Hasi baino lehen esan beharra dut nik eskuarki liburuak liburutegi publikoetatik hartu ohi ditudala eta oraingoan ere hala egin badut ere liburu erdia irakurria nuenean , hainbat pasartetan azpimarratzeko beharra sentitu dut eta etorkizunean berriro ere irakurtzeko gogoa izango dudala uste dudanez, liburu-dendara joan naiz zuzenean nire alea erostera!
Zer da gustatu zaidana?
– Estetika aldetik Pamielak egindako edizioa oso txukuna iruditu zait. Irakurtzeko erraza, argazki eta marrazkiak ere baditu gaukariak bere baitan eta oin oharrak bilatzeko ere nahiko erraz egiten da. Aurkibide onomastikoak ere asko laguntzen du!
– Gaukari formatua irakurtzeko polita dela uste dut, paragrafoak birritan irakurtzea ahalbidetzen du, lasaitasunez hartuz. Sarrionandiaren hausnarketak ez dira luzeak usaian eta batetik bestera salto handiak egon arren beti dute halako loturaren bat, bai atalarekin, bai hilabeteko egunarekin.
– Idatzi motzak dira eta batzuk azalekoak izan arren beste batzuk sakonera handikoak dira, hala nola “Gauzak kontatzeaz”, “Indarreren ideologia”, “Atalaseak” “Egin ala izan” … irakurtzea merezi dute.
– Definizio moduko esalditxoak ere oso gustuko ditut:
“Literatura: Norberaren baitan errefuxiatutako mamuak beste batzuen barrura pasarazteko ahalegina da literatura”
– Politika eta bereziki kolonialismoari buruzko gogoetak, Latinoamerikako kondaira eta ikuspuntuak ere biziki eskertu ditut.
– Zer da gustatu ez zaidana?
– Oin oharrak gehiegitxo izan daitezke, lehen esan bezala nahiko erraz aurkitzen dira, baina batzuetan ez dute informazio gehiegirik eskaintzen, irakurketa pixka bat motelduz.
– Itzulpenak ere eskaintzen dizkigu Sarrionandiak, baina ez dakit hobe izango litzatekeen idatzitako hizkuntzan uztea… ez da erreza poesia itzultzea!
– Beste autore batzuek, beste hizkuntzatan idatzitakoak ere ekartzen dizkigu liburura, baina ez dutela gaukariaren puzzlea hain ondo betetzen dirudit.
– Beste irakurleen kritikak irakurtzeko, jarrai ezazu #maiatzekoliburua traola eta iritziak irakurtzeko: https://mastodon.eus/tags/maiatzekoliburua
